मडगाव, ता. 7 (प्रतिनिधी) ः नादिया तोरादो मृत्यू प्रकरणी गुन्हा अन्वेषण विभागाच्या पोलिसांकडून अटक होण्याची शक्‍यता असल्यामुळे न्यायालयाला शरण आलेले माजी पर्यटनमंत्री मिकी पाशेको यांना मडगावच्या सत्र न्यायालयानेही आज जामीन नाकारला. तसेच उच्च रक्तदाब व काविळमुळे प्रकृती बिघडल्याचे कारण देऊन हॉस्पिसियो इस्पितळात दाखल झालेल्या पाशेको यांच्या पोलिस कोठडीतील चौकशीसाठी पोलिसांनी फौजदारी गुन्ह्याच्या 167 व्या कलमान्वये प्रथमश्रेणी न्यायालयाकडे अर्ज सादर करावा, असा आदेश आज अतिरिक्त सत्र न्यायाधीश प्रमोद व्ही. कामत यांनी दिला. नादियाच्या मृत्यू प्रकरणात अनेकजण गुंतले असून, त्यात पाशेकोंचा प्रमुख्याने सहभाग असल्याचे प्रथमदर्शनी पुरावे पोलिसांकडे आले आहेत. त्यामुळे या प्रकरणाची कसून चौकशी करण्यासाठी संशयित आरोपीला पोलिस कोठडीत ठेवणे गरजेचे असल्याचे गुन्हा अन्वेषण विभागाने म्हटले आहे. या विभागाच्या तपास अधिकारी निरीक्षक सुनीता सावंत यांनी सत्र न्यायालयात तशा आशयाचा एक अर्ज सादर केला होता. हा अर्ज वैध धरण्यात येत असून, पाशेकोंच्या न्यायालयीन रिमांडची मुदत दुपारी 3.

नवी दिल्ली,   ता.7: सीमावादावर केंद्रीय गृहमंत्रालयाने सर्वोच्च न्यायालयात दाखल केलेल्या प्रतिज्ञापत्राच्या पार्श्‍वभूमीवर महाराष्ट्राचा बेळगाव भागातील 865 गावांवरील दावा कायम असून, केंद्र सरकारच्या भूमिकेतही बदल झालेला नाही, असे स्पष्टीकरण महाराष्ट्राचे मुख्यमंत्री अशोक चव्हाण यांनी आज केले. केंद्राच्या प्रतिज्ञापत्रात महाराष्ट्राची याचिका रद्द करावी आणि राज्यावर दंड आकारला जावा, अशी भूमिका असल्याच्या बातम्या प्रसिद्ध झाल्यानंतर संभ्रम निर्माण झाला. कर्नाटकमधील काही संघटनांनी त्यावर आनंद व्यक्त केला. तर महाराष्ट्र एकीकरण समिती आणि इतर संघटनांनी महाराष्ट्र सरकारवर टीका केली. त्या पार्श्‍वभूमीवर कालपासून दिल्लीत असलेल्या चव्हाण यांनी गृहमंत्री पी. चिदंबरम यांची भेट घेऊन या विषयावर चर्चा केली. यानंतर पत्रकार परिषदेत चव्हाण यांनी महाराष्ट्राच्या मूळ दाव्यात आणि केंद्राच्या भूमिकेत कोणताही बदल झालेला नसल्याचा दावा केला. या संदर्भात प्रसिद्ध झालेल्या बातम्यांचा चुकीचा अर्थ लावला गेला असावा, असे ते म्हणाले.

पणजी, ता. 7 (प्रतिनिधी) ः तिकीट दरवाढीच्या गेल्या 5 जुलै रोजी काढलेल्या आदेशामुळे अखिल गोवा बसमालक संघटना आणि वाहतूक खाते यांच्यात सुरू असलेल्या वादातील गोंधळ जास्तच वाढला आहे. सरकारने काढलेला हा आदेश बसमालकांची फसवणूक करणारा आहे. त्यामुळे प्रत्यक्षात तिकीट दर वाढण्याऐवजी ते कमी झाले आहेत, असा आरोप आज बसमालक संघटनेने पत्रकार परिषदेत केला. या पत्रकार परिषदेला बसमालक संघटनेचे अध्यक्ष शिवदास कांबळी, सरचिटणीस सुदीप ताम्हणकर, उत्तर गोवा बसमालक संघटनेचे अध्यक्ष सुदेश कळंगुटकर, शेख फय्याज, हेमंत हळदणकर उपस्थित होते. लांब पल्ल्याच्या बस प्रवासासाठी पहिल्या 1 ते 5 किलोमीटरला 5 रुपये व त्यापुढील प्रत्येक किलोमीटरमागे 55 पैसे आकारावेत, तर शहरातील बससेवेसाठी पहिल्या 1 ते 5 किलोमीटरला 4 रुपये व त्यापुढील प्रत्येक किलोमीटरमागे 50 पैसे तिकीट आकारण्याचा आदेश वाहतूक खात्याने जारी केला आहे. पण, हा आदेश फसवणूक करणारा आहे. त्यामध्ये तिकीट दरवाढ केलेली नाही, उलट दर कमी केले आहेत. लांब पल्ल्यासाठी पहिल्या 1 ते 3 किलोमीटरला 5 रुपये तिकीट होते. हाच दर आता पाच किलोमीटरसाठी ठेवण्यात आला आहे.

पणजी, ता. 7 (प्रतिनिधी) : "नादिया तोरादो मनाने फारच कणखर होती. मी तिला गेली अनेक वर्षे ओळखत होते. तिने आत्महत्या केलेली नाही, तिचा खूनच केलेला आहे. खुनानंतर आरोपीने पुरावेही नष्ट केलेले आहेत. पोलिसांनी प्रकरणाची चौकशी करून पुरावे गोळा करावेत व खुन्याला शिक्षा द्यावी', असा सूर महिला चळवळीतील कार्यकर्त्यांनी पणजीतील एका बैठकीत केली. अखिल भारतीय महिला परिषदेतर्फे गोवा चेंबरमध्ये एका बैठकीचे आयोजन केले होते. या बैठकीत महिलांवर होणारे अत्याचार, महानंद नाईक प्रकरण, नादिया तोरादो मृत्यू प्रकरण आदींवर चर्चा झाली. ज्योती कुंकळकर, आवडा व्हिएगश, निर्मला सावंत, प्रमोद साळगावकर, तारा केरकर, ऍड. शुभलक्ष्मी रायकर, भारती प्रभुदेसाई आदी महिला व्यासपीठावर होत्या. बैठकीला जवळपास पन्नास महिलांची उपस्थिती होती. तारा केरकर व आवडा व्हिएगश यांनी नादिया तोरादोने आत्महत्या केली नसून तिचा खूनच झाल्याचे प्रतिपादन केले. मिकींच्या आईला अटक करा : केरकर नादिया तोरादो मृत्यू प्रकरणी बऱ्याच बाबी अद्याप स्पष्ट झालेल्या नाहीत. माजी मंत्री मिकी पाशेको व नादिया तोरादो यांच्या दरम्यानचे संबंध कसे होते.

डर्बन, ता. ७ ः विश्‍वकरंडक फुटबॉल स्पर्धेतील विजेतेपदाचे स्वप्न साकारण्यासाठी प्रयत्नशील असलेल्या युरोपीय विजेता स्पेनने बलाढ्य जर्मनीचा १-० असा पराभव करून अंतिम फेरीत स्थान मिळवले. पहिल्यावहिल्या विजेतेपदासाठी त्यांना आता रविवारी (ता. ११) हॉलंडशी मुकाबला करावा लागणार आहे. डर्बन येथील मोझेस माबिदा स्टेडियमवर रंगलेल्या या सामन्याच्या विश्रांती पूर्वीच्या पहिल्या भागात दोन्ही संघांना गोल करण्यात अपयश आले. दोन्ही संघांकडून गोल करण्यासाठी रचलेल्या चाली शेवटच्या फटक्‍यापूर्वीच अयशस्वी ठरल्या. पूर्वार्धात बहुतांश वेळ जर्मनीच्या भागातच चेंडू राहिला. स्पेनच्या आक्रमकांनी आक्रमणही केले पण जर्मनीच्या बचावपटूंनी चांगली कामगिरी करत हे आक्रमण मोडून काढले आणि प्रतिआक्रमणाचे अनेक अयशस्वी प्रयत्न केले. पंधराव्या आणि सोळाव्या मिनिटाला जर्मनीला लागोपाठ कॉर्नर मिळाले. त्यांना त्याचे गोलमध्ये रूपांतर करता आले नाही. उत्तरार्धाच्या सुरवातीला स्पेनने काही चांगल्या चढाया केल्या पण त्यांना गोल करण्यात यश आले नाही. ५८ व्या मिनिटाला स्पेनला पहिला गोल करणे शक्‍य होते. अलोन्सोने बॅक हिलने इनिएस्टाकडे पास दिला.